يقال والعهدة على الراوي

[ابو فواز]

يقال والعهدة على الراوي , الذي ليس مهماً أن تصدقه , أن نجاراً عجوزاً كان يعمل في صناعة المراكب على شاطئ أبوروف في بأم درمان , وبينما هو منهمك في عمله سقط منه ( المنشار ) في النهر , فجلس يبكي على ضياعه , وكانت هناك ( جنية ) تراقبه ( غالباً كانت قاعدة قريب من سوق الطلح العجيب داك ) فحضرت إليه الجنية وسألته :
-( الببكيك شنو يا عمو) ؟
قال النجار في هلع :
-( لقد سقط منشاري في النهر , وبعدين إنتي منو يا بتي ) ؟
لم ترد عليه الجنية , بل غطست في النهر , وخرجت بمنشار من ذهب وسألته :
-( ده منشارك يا عمو ) ؟
قال النجار : ( لا ما منشاري )
فغطست الجنية مرة ثانية وخرجت بمنشار من فضة وسألته :
-( يا هو ده يا عمو ) ؟
قال النجار دون تردد :
-( برضو لا , ما حقي )
ثم غطست الجنية مرة ثالثة , وخرجت بمنشار من البرونزوسألته :
-( أكيد ده منشارك ) ؟
رد عليها النجار : ( لا )
لم تيأس الجنية فغطست مرة أخرى وخرجت بمنشاره الحديدي ( الشين ) وسألته :
-( يا هو ده يا عمو مش ) ؟
قال : نعم وقد إرتسمت السعادة عليه لحصوله على منشاره , فقامت
الجنية بإهدائه المنشار الذهبي والفضي والبرونزي , لأمانته وصدقه .
مرت الأيام والليالي , وجاء يوم ( كثير الغيوم كثير المطر ) , واذا بذات الرجل وهو ( كان قاعد يتفسح ) مع زوجته على الشاطئ , فإنزلقت قدمها , وسقطت في النهر , فجلس النجار يبكي , فحضرت ذات الجنية وسألته :
-( الببكيك شنو يا عمو , برضو منشارك تاني وقع ) ؟
-قال : ( أبداً , أم أولادي وقعت في الموية )
فغطست الجنية وخرجت تحمل من جوف الماء ( هيفاء وهبي شخصياً ) وسألته :
-( دي ياها مرتك يا عمو النجار ) ؟
قال النجار دون أن يهتز له جفن أو( قسيمة ) أو حتى ( عشرة الأيام ) :
-( آي والله يا بتي , يا ها ذاتا مرتي الوقعت مني )
قطبت الجنية جبينها وقالت :
-( كذاب يا عمو , ليه داير تغشني ) ؟
رد الرجل في مسكنة ودهاء :
-( كذب شنو يا بتي , أنا خفت أقول ليكي ما يا ها , تقومي تغطسي
تاني تجيبي لي ( أليسا ) ولو قلت ليكي برضو ما ياها , تغطسي تجيبي لي ( نانسي عجرم ) ولو قلت ليكي ما ياها , تغطسي تاني تجيبي لي مرتي ( الجد جد ) ولو قلت ليكي ياها تب , تقومي تهدي لي هيفاء وأليسا ونانسي , وأنا راجل عجوز ما بقدر على الدواهي دي كلها , قلت نشيل هيفاء ونمشي , وربنا يسهل علينا وعليكي , وعلى التماسيح الحتاكل مرتي .
من ما راق لي