اخوي جبل تكفى دلني على العلم الاكيد

[ام الحلوين]

السلام عليكم اخواني جميعا ومبروك علينا وعليكم الشهر الكريم
اخوي حبل الله يوفقك وين ماتوجهت انا من قبل حوالي ست شهور استفسرت بخصوص تسجيلي بالضمان والحمدلله ابشرك انقبلت بفضل الله سبحانه ثم بفضل توجيهاتك
ماعليش تحملوني بس موضوعي معقد انا متزوجه وعندي عيال اثنين ولله الحمد واستلم اعانه من التاهيل واعانه من الضمان لاني اساسا مو مضافه مع زوجي لانه مامعه جنسية بدون يعني واللحين بيننا مشاكل ومايبي يصرف على البيت وعلى العيال وماعاد الحق بالمصاريف اصرف الراتبين كلهن ويادوبك شهر يغطن وشهر لا
سوالي هل اقدر اضيف عيالي معاي بالضمان وهم مالهم اي اثباتات غير بلاغ الولادة وانا مامعي اثبات للزواج غير ورقة ملكة عند شيخ يعني مو مثبته بالمحكمه وزوجي ماعنده اي اثبات غير ورقة من اللجنة بس انا سعودية واوراقي كامله وانا مو مطلقة بس اوضاعنا متوترة يعني شبة منفصله
فتكفى اخوي عطني العلم الاكيد الله يجزاك الجنة

 

[أمير الأحزان]

رد: اخوي جبل تكفى دلني على العلم الاكيد

هلا اختي ...
انتبه لا تضاف اولادك بالضمان السبب انتي مو مضافه معك زوجك دفتر العائله يعني انتي غير متزوجه و كيف جابت اولادك و أنتي غير متزوجه ؟؟؟
اختي انتي مسجل الضمان 862 ريال كل شهر و قدم مقطوعة 10400 ريال كل سنة وبس انتي فقط
لا تضاف اولادك بالضمان ولو يضاف اولادك راح عقوبة مخالفة و يسقط الضمان ....

ولو مطلقة يشمل يضاف اولاده السبب ابوه مايصرف اولاده .....

و ان شاء الله يجي جبل ويفيدوك ...
وبالتوفيق ....

 

[قاهر اليأس]

رد: اخوي جبل تكفى دلني على العلم الاكيد

اختى انتبهى نفس ماقالك الاخ امير الاحزان بالحرف وبالسطر انتبهى زي ماقالك انتى مخالفه تصيرين كذا ان قلى عندك اولاد ومتزوجه تسقط عنك على طول لان الزوجه تتبع زوجها وهو يصرف عليها .. يعنى زوجك سليم مافى شي ويقدر يصرف عليكم .. وان جيتى للقانون كذا انتى غير قانونيه متزوجه وتستلم اعانه على طول يقطعونها عنك . خذى العلم بس الوزاره تبغى شى رسمى ماتبغى اشياء على بياض .. بالتوفيق

 

[ام الحلوين]

رد: اخوي جبل تكفى دلني على العلم الاكيد

الله يجزاكم كل خير ياخوان وان شالله بعد اخوي جبل يعطيني العلم الاكيد وماعليه ماتضيق الا على ربي فرجها

 

[قاهر اليأس]

رد: اخوي جبل تكفى دلني على العلم الاكيد

حنا نفس ماعلمناك وماعلينا الا ان نرفع لك الموضوع علشان ينتبهون الاخوان ويدخلون

 

[ام الحلوين]

رد: اخوي جبل تكفى دلني على العلم الاكيد

الله يجزاك الخير اخوي قاهر اليائس وان شالله ربي يرزقنا ويرزقكم وكل محتاج يارب

 

[قاهر اليأس]

رد: اخوي جبل تكفى دلني على العلم الاكيد

للرفع

 

[ابو مقبل]

رد: اخوي جبل تكفى دلني على العلم الاكيد

في الاحوال انتي مسجلة عزباء صح لو غير كذا مايصرف لك شي من الضمان
ايضا مستنداتك غير شرعية وغير رسمية فيما يخص الابناء والزواج

انصحك بعد المخاطرة بالتقديم قبل الاستشارة ترى ربعنا معلثين يعني يدورون حرش
لا تتحرشين فيهم

 

[معاند الضيم]

رد: اخوي جبل تكفى دلني على العلم الاكيد

وعليكم السلام


إسأل الله ان يفرج همك وان يعينك ويسخر لك من يقوم على حوائجك

اختي حالتك خاصة و لا تنطبق عليها الشروط العامة
راسلي الاخ جبل على ايميله حتى يتم الرد عليك بشكل اسرع

تواصلي مع الجمعيات الخيرية ان كنتي تستحقين سيتم دعمك

ولكي مني الدعاء ان الله ييسر امورك

 

[ام الحلوين]

رد: اخوي جبل تكفى دلني على العلم الاكيد

انا والله ياخواني ماحب اطلب احد ودي اتوظف وانا اعين نفسي وعيالي بس حالتي الصحيه اللحين ماهي مستقرة
بس ادعولي ان الله يوفقني بوظيفه ويغنيني بحلاله عن حرامة وبفضله وكرمة عن سواه
انا وكل محتاج يارب
والله يجزاكم جميعا عني كل خير واذا فيه مكان يطلبون توظيف ياليت انكم تكتبون بالمنتدى علشان استفيد انا وغيري

 

[قاهر اليأس]

رد: اخوي جبل تكفى دلني على العلم الاكيد

اختى ادخلى على قسم توظيف ذوى الاعاقه بالمنتدى هنا . وزى ماقلنالك اول لا تقطعين رزقك تراهم يدورون الزله على الواحد خلك مثل ما انتى اوراقك ماهى رسميه راح تعفسين نفسك عفس . بالتوفيق لك

 

[ام الحلوين]

رد: اخوي جبل تكفى دلني على العلم الاكيد

والله انا ودي بالوظيفةحييييييل بس وين الوظايف طلباتهم تعجيزيه والي مايبون شهايد مايغطن تكاليف الحياه
بس انشالله اني اسوي عمليتي واتعافى وبعدها انشالله ادورلي وظيفه تسد حاجتي انا وعيالي

 

[ام الحلوين]

رد: اخوي جبل تكفى دلني على العلم الاكيد

الله يجزاكم خير الجميع ويجعلنا وياكم من عتقائه من النار ويغفر لنا ولكم ويفتح لنا ابواب رزقه
ويغنينا بحلاله عن حرامه وبعفوة عمن سواه

 

[قاهر اليأس]

رد: اخوي جبل تكفى دلني على العلم الاكيد

تسلمين اختى حنا وياكم ان شاء الله .. وان شاء الله اتسوين عمليتك وتقومين بسلامه .. موفقه