الدوام بعد صلاة الفجر ، موظف وطالب .. يازينه

[صديقة ذوي الإعاقة]

الدوام بعد صلاة الفجر ، موظف وطالب .. يازينه
السلام عليكم ،،

والله انا من الناس اللي عانيت شديد خالص من قومة الفجر للصلاة ،،
وانا اجزم من صفوف المسجد ان المشكلة تواجه 80% من المجتمع ..
ان نمت متأخر راحت علي .. وان نمت مبكر توهقت بعد الصلاة ساعتين تروح هدر ..!
ومعروف ان بعد صلاة الفجر وانت شبعان نوم يكون النشاط عندك 100% ،،

والرسول صلى الله عليه وسلم يقول في الحديث الصحيح : بورك لأمتي في بكورها .
وحنا في الرياض اللي فيها جميع الوزارات الحكومية والمصالح الحكومية الأخرى فيها ملايين الموظفين والجو عندنا ثمان شهور حر صيف قيض سموم واربع شهور شتا .. يعني ثمان شهور في عز الصيف انت مضطر تقضي ساعتين في الشمس رايح جاي في الطريق من وإلى الدوام ، تخيس رايح وتعفن جاي . وحنا بحل عند الطلاب المتراصين في الباصات ..!! طبعاًَ لو عندك مدارس تتضاعف عدد الساعات في الخياس لإنك بتطلع الظهر وترجع ..

الحل بسيط .. دوامين صيفي وشتوي .. حسب توقيت صلاة الفجر
انا انسان ودي اداوم في الصيف الساعه 5،30 .. بعد صلاة الفجر بساعه ونصف وخل هالساعه ونصف تروح في زحمة الطريق ياخي برد على قلبك مهوب الساعه سبع وتوصل ثمان والشمس تلاحقك ملاحق كل هالثمان شهور كنها طالعه لك لحالك .. والمدارس نفس الشئ .. واضن هم المستفيد الاكبر لإن ممكن تعطي حصص اضافية وتطور تعليمك هالمخيس .. ونطلع الساعه 12،30 الظهر نصلي في الدوام او في الطريق .. مافيه مشكلة لكن اللي عنده مدارس يمديه على عياله ، واللي عنده جامعه او وظيفة لزوجته او اخته او بنته يمديه يجيبها .. ونستغني عن السواويق حقين التوصيل وبلاويهم .. طبعاً في حال لقيت سواق يعطيك وجه .. كلهم فل ..

وفي الشتا تكون الصلاة على الساعه 5 الفجر يكون الدوام الشتوي يبدأ 6،30 تطلع وانت تدور الشمس دواره كنها تتصدد عنك ماتبيك ( عكس الصيف يعني ) ونطلع 1،30 .. وخصلنا ..
بالنسبه للي عنده عيال مدارس تحس النهار بالدوام الحالي عقوبه .. من يطلع من بيته 7 الصبح حتى يرجع 3 العصر ؟ وينام شوي العصر عقب الغدا ساعتين يصحى ع المغرب ؟ راح النهار ..!! يبي يجلس شوي يتقهوى الا العشا دخل وقته ، يطلع يخلص اغراضه يرجع يلقى عياله ناموا ؟ طيب شلون يدرسهم ويتابعهم ..!! انا لي صديق يحلف بالله ان ايام الاسبوع مايشوف عياله .. نص يومه في الدوام يرجع ينام شوي يصحى يحصلهم ناموا .. (هو حظه من ناحيه وحده بس .. )

يعني فيه فجوه بين الطالب وأبوه الموظف .. حرام صراحه اللي قاعد يصير ان كان في الدوام الحكومي على الموظف وعلى الدوله لإن الموظف مضطر يقتطع ساعتين كل يوم على حساب الدوله يجيب عياله الظهر ويرجع وايضاً على حساب صحته وراحته وماله لما يطق مشوار بسيارته في عز الظهر يدور على المدارس يطلع عياله يوديهم البيت ثم يرجع للدوام ؟

فايدة الدوام بعد صلاة الفجر ..
يكفي فائده واحده : امتلاء المساجد واعانة المسلمين على الصلاة في المسجد وفي وقتها .. وهي اهم صلاة يتخلف عنها المسلمين بسبب النوم .. واللي يصلي الفجر في المسجد يعرف كيف الصف الأول مايكتمل إلا في رمضان .. وبعدين مابتدعنا شي من مخابينا .. الطبيعي والمفترض يكون هالشئ وغيره اللي ماهو صحيح ..

الفائده الثانية استغلال النشاط الفطري في الفجر الباكر للموظف والطالب .. تخيل تدخل الفصل لو كنت طالب والشمس تشرق حتى اسم الشروق رومنسي .. مهوب تدخل الفصل والشمس تحسها داخله مخك وطالعه مع خشمك .. وفوقها صف طابور صباحي وتمرين مخيس .. في هالقايله ..
الموظف يدخل مكتبه يفتح الستاره يتابع شروق الشمس وهو يتمغط مبسوط و يرجف الباب مراجع بثر مصلي الفجر في مسجد الوزاره بس عادي النفس طيبه يعني .. بكيفه ..

الفائده الثالثة يكون هناك مجتمع نهاري منتج .. يعني المحلات والأسواق والحاجيات والاحتياجات كلها تُقضى في النهار لإن معك وقت كافي جداً وتقدر تزيد عدد ساعات العمل للي ظروفه كويسه وتستفيد ويستفيد . وبعد صلاة العشا بساعه (9) تقفل كل الأسواق التجارية والمحلات مثل ماهي الساعه 11 او 12 حالياً .. وبيكون الأمن في اعلى معدلاته لإن الليل بيكون سكن .. وللسكن ( افتح السين الاولى وسكون على الثانيه واقرا المعوذات ) ..
وانا والله دورت عوائق تمنع هالشئ مالقيت ..! من عنده عوائق يعني يطلع لي برا

بعدين والشئ المهم ، لو كان هناك زحمة طلاب وتكدس بإمكانك تعمل شفتين للدراسه خاصه الكليات .. يمديك ويمدي ابوك بعد ..
تبي شفتين للدوام .. برضو يمديك ويمدي ابو اللي جابك بعد ..
وكان فيك خير قل لا مايمدي ..

اعجبني فنقلته لكم

 

[اخوكم]

رد: الدوام بعد صلاة الفجر ، موظف وطالب .. يازينه

فكرتك جداً ممتازه أهنيك صراحه على فكره الراقي
واتمنا من كل قلبي ان ينفذ كلامك على الاقل يكونو عون لنا لصلاه الفجر بس مين يسمع منك

اذا صلاة الظهر ياذن علينا في الفصل ولا المدراء ولا المدرسين يصلون الاستاذ يشرح والمؤذن ياذن

الله المستعان

 

[عيسى محمد]

رد: الدوام بعد صلاة الفجر ، موظف وطالب .. يازينه




الله يعافيك بصمة تميز موضوعك مميز حقآ

 

[احمد زايد]

رد: الدوام بعد صلاة الفجر ، موظف وطالب .. يازينه

فكرة ممتازة

الوضع الحالي فيه مشكله اذا قام الموظف او الطالب لصلاة الفجر يكون عنده وقت كثير لحد دوامه اذا رجع ينام مشكله واذا واصل وماصحي للفجر مشكله اكبر

 

[صديقة ذوي الإعاقة]

رد: الدوام بعد صلاة الفجر ، موظف وطالب .. يازينه

جزيتم الجنة