على حسب ما مرني ومن علوم الاولين

[ابو فواز]

على حسب مامرني ومن علوم الاولين
وجهة نظر ويجوز فيها اتفاق ٍ وانقسام



اترك مسافة كافية بينك وبين الآخرين
بعض البشر ودك حدود المعرفة معهم سلام


اصمت ولاتحرص على كثر الكلام الصمت زين
اللي سكوته ساتره يمكن يعريه الكلام


إذا تكلمت احذر تكون أطول المتكلمين
السالفة لاطولت يضعف معاها الاهتمام


أمزح ومزحٍ باللسان أخير من مزح اليدين
مزح الرجال العاقله على حدود الاحترام


اضحك ولاتضحك برفع الصوت رفع الصوت شين
من الأدب والذوق عند الضحك ضحكٍ بابتسام


أكرم وبيبان الكرم واجد ولا يحتاج دين
وترى الرجال إكرامها ماهوب في كثر الطعام


احلم ولا تعجل ولا تغضب ولا تشري بدين
وشاور ولو رأيك معك لا شرت عداك الملام


إذا شريت بدين لاتبطي على المتجملين
كلٍ حلاله غاليٍ عنده لو إنه مايسام


لاجاك مديونك معه بعض الوفى وبعضه لحين
فأستد باللي جاك وش دراك لله الدوام


ترى التغافل فيه لذه وانشد المتغافلين
وإن جات كلمة توجع أطلقها مع سرب الحمام


أرضى ليا جاك الرضى لو العذر ماهو سمين
وترى التسامح ميزة السادة رفيعين المقام


أصدق مع نفسك وتلقى نفسك من الصادقين
والنفس خيل أبليس لاتعطيه نفسك واللجام


ليانصحت انصح خفى لاتفضحه فالحاضرين
ترى الرجال يقودها لين الحكي قود الخطام


إذا تسولف عن طموحاتك مع المتفرغين
كنك تسولف للنصارى فالحلال وفالحرام


العمر ماهو فرصةٍ وحدة ولاهو بفرصتين
مع كل مطلع شمس لك فرصة وخطوة للأمام


لا زالت تعلمنا الليالي والسنين
والعلم خير من الجهل والنور جلاي الظلام

من ماراق لا خوكم

 

[الصبر]

رد: على حسب ما مرني ومن علوم الاولين

ليانصحت انصح خفى لاتفضحه فالحاضرين
ترى الرجال يقودها لين الحكي قود الخطام

صح لسان قايلها وتسلم يمين ناقلها اخي العزيز ابوفواز

 

[إحسـاسي]

رد: على حسب ما مرني ومن علوم الاولين

اترك مسافة كافية بينك وبين الآخرين
بعض البشر ودك حدود المعرفة معهم سلام

اصمت ولاتحرص على كثر الكلام الصمت زين
اللي سكوته ساتره يمكن يعريه الكلام

أبيـااات راائعه
فيهـا حكم جميله وقيمه
صح لسان قايلها
وعلآ شأن ناقلها

إختيار أكثر من راائع اخي ابو فواز
يعطيك العافيه
وتقييمي وتقديــري لك "​

 

[سموالنفس]

رد: على حسب ما مرني ومن علوم الاولين

[align=center]قصيدة نصائح وحكم صادقه وخير الوصيه والنصيحه من الشعر الجزيل
من اجمل ماقرات راقت لي مثلما راقت لك ولغيرك موفق ومميز باختيارك لم نكن نعلم عنها لو لاالله ثم انت اخوي ابو فواز لانها من قصائد النصح النادرة
تحيه طيبه لك [/align]

 

[ابو فواز]

رد: على حسب ما مرني ومن علوم الاولين

صح الله بدانك اخي العزيز الصبر
شرف لي مرورك الله يسلمك ويبارك فيك
احترامي لك

 

[ابو فواز]

رد: على حسب ما مرني ومن علوم الاولين

ويعافيك ربي اختنا احساسي
الاكثر من رائع دوما مرورك بارك الله فيك
نعم ابيات رائعه جدا فيها الكثير من ما تفضلتي به
اعجبتني كثير جميله من بداها الى نهايتها كل الشكر لك على التقييم
احترامي وشكري وتقديري لك

 

[ابو فواز]

رد: على حسب ما مرني ومن علوم الاولين

حياك الله اخي سمو النفس
شرفني مرورك وكلامك الطيب طاب عملك واسعدك ربي بالدارين
فعلا قصيدة جزيله تضمنة ما تفضلت به الله يعطيك العافية كل الشكر لك على التقييم
احترامي وتقديري لك