♥♫ إلى كل سعودية وسعودي ♫♥‎

[بدر بن فهد]

[align=center]

صراحه الايميل منعش

​

[/align][align=center]

إلى كل سعودية

وسعودي

..

ارفع القبعه احتراما وتقديرا..

بارككم الرب وجزاكم الجنه خير جزاء للصابرين

..​

​

كلنا تمر علينا لحظات تفكير عنيفه..تاخذ الواحد لبعيد..

وكل شخص له اجواء خاصه تحفز مثل هالافكار وتخرجها للخارج..
والافكار والهواجيس تختلف من شخص لاخر..وتختلف جوده هالافكار برضو من شخص لاخر..​

وبينما انا في الباص

(القلب له بس اذا كانت راجعه للبيت)

..

و شمس الرياض

اللطيفه تطبخني على نار هادئه..
قفز لعقلي الملئ بـخربشات عبيطه

..حقيقة واستكشاف

..​

اكتشفت انا نحن الشعب السعودي العظيم

..شعب.. قوي..مكافح..صبور..

شعب شعاره فلها وربك يحلها

..بكل مايعنيه هذا الشعار من معاني وفوائد..​

ليه؟..​

اولا..على الرغم من الضايقه المالية اللى يعيشها اغلب الشعب

..

والتطفير والفقر اللى يشع ويلمع من عيوننا

..
الا اننا اكثر بشريه في العالم تتسوق

..شغالين مقاضي من سوق لسوق

..من محل لمحل

..
مايمديك تسمع عن كريم رائع رهيب فله الا خلص

..
بلوزة حلوة في المحل الفلاني تعال افلقني اذا لقيتها في اي فرع من فروع المحل

..
روج وردي خاقوقي..جزمه فلات مريحه..تنورة سوداء راكزه..مافيه بح اختفت

..
وياليته عالاسواق ابد فرمنا ابو المطاعم فرم

..
مطاعم الاسواق تشتكي..مطاعم الشوارع

..
امه لا اله الا الله عندها..
فتح تشيليز وابل بيز ولو تشوف الطوابير حولها تقول هذولاء ماعمرهم شافوا أكل

..
مطفرين و شغالين بلع

..​

من ناحيه الدراسة

..

عندنا من اسوأ الجامعات والمدارس

..اغبى الانظمه والقوانيين

..تعقيدات ومصاعب

..
مبانينا خربانه.. قاعاتنا مكسره(اذا جيت بدخل القاعة متاهه..لازم اتأكد ان كل بلاطه

بمشي عليها ثابته تفاديا لاي تعكرف والا طيحه ممكن تسبب فشيله).. حماماتنا زكيه(الله الله يا الحمامات على اخر الدوام وبما ان التصريف عندنا على قدر عالى ماتشم غير روائح الفل والياسمين)..
مكافئاتنا ماتصرف(تخيلوا كليتنا نزلوا مكافئتنا على البنك بعد معاناه دامت لسنين من التسليم يد بيد

..وبعد فتره وجيزة تطاقوا هم والبنك

ورجعوا على النظام الاول)..قاعتنا ماتبرد(طيب تخيلوا مره ثانيه انه طول الترم الثاني اغلب قاعتنا خربت المكيفات تخيلوا في هالحر بدون مكيف

تدرون ليه؟برضوا الشركة المسئوله عن التكييف عندنا تخاصموا مع كليتنا

).. ​

بس وفي المقابل الشعب شغال تعليم

..طلابنا كثييييير

..الجامعات والمدارس مليانه

..

واجبات وبحوث تعجيزية نقدم

..
امتحانات صعبه نحل

..
انشطه نشتغل

..
تفوق نتفوق

..
نظام التراكمي من اولى ثانوي تحسب الدرجات

..
القدرات

..
التحصيلي

..
تخصصات قليلة ترضى الطموحات

..
ومازال طلابنا يحصدون الـ99 والـ100

..
هب عليكم..ماتعوق معهم ماشاء الله..​

سقط سوق الاسهم سقطه..

عورت المجتمع

وضربته على قفاه ضربه موجعه

..
المؤشر احمر احمر احمر...
والشراء اخضر اخضر اخضر

..
ومازال شعبي الجميل يشتغل بالاسهم..​

بناتنا يقولون..

عيالنا شيون... خشنيين..مايدلون طريق الرومانسيه..انانيين..مشهبين..مايملى عينهم الا التراب..
عيالنا يقولون..
بناتنا..شينات..دلوعات..مايتحملون مسئوليه..ركبهم سود..مهورهم غاليه..
ومع ذلك الزواجات على افى من يشيل

..
القاعات فل

..
المشاغل زحمه..
وماليزيا تشتكى

..​

مافيه اماكن نتمشى فيها

..

لاطبيعه ولا تطور..(ياحبايبي انا

..طلعت المملكة والفيصلية من خشومنا..دخلوها في كل شئ حللو ابوها تحليل)..
فماذا فعلنا؟؟..
افترشنا المخططات

..
مترنا الاسواق

..
استوطنا الثمامه

..​

شوارعنا محفره..مكسره..معفنه..

وفوق كل ذا نعاني من زحمه مو طبيعيه..​

النت عندنا خايس...

وندخل النت ونسولف ونتواصل ونحمل ونسوى اشياء كثيييير ولا بيهمنا..​

هذا الموضوع الى كل سعودية وسعودي مكافح...

سلخته الشمس واعدمت جلده

..
اتعبه الكبت وكتم نفسه

..
قتلته الواسطه وحطمت اماله

..​

صامدون

صامدون

صامدون

..

سنعيش

..سنلعب

..سنحب

..وسنرقص

ونغنى

ولو حتى بدون موسيقى..​

والله اننا قويين

..

لله دركم ما أعظمكم​

(أعجبني الموضوع وهو منقول من بريدي وعذرا إذا وجدتم أخطاء إملائية)​

[/align]

 

[لى لى]

رد: ♥♫ إلى كل سعودية وسعودي ♫♥‎

اهم شئ اننا قويييييييييييييييييين اللة المستعان

 

[غلاها من حلاها]

رد: ♥♫ إلى كل سعودية وسعودي ♫♥‎

يسلمووووووو خيو بدر على انقل يعطيك الف العاافيه
تقبل تحياتي.

 

[بدر بن فهد]

رد: ♥♫ إلى كل سعودية وسعودي ♫♥‎

اهم شئ اننا قويييييييييييييييييين اللة المستعان

[align=center]
حياك الله أخت (لي لي)

شرفني مرورك
[/align]

 

[بدر بن فهد]

رد: ♥♫ إلى كل سعودية وسعودي ♫♥‎

يسلمووووووو خيو بدر على انقل يعطيك الف العاافيه
تقبل تحياتي.

[align=center]

الله يعافيك أختي

وأسعدني مرورك
[/align]

 

[احتضار]

رد: ♥♫ إلى كل سعودية وسعودي ♫♥‎

مشكور على النقل اخوي

 

[كيكة إسفنجية]

رد: ♥♫ إلى كل سعودية وسعودي ♫♥‎

اييييييييييييييييييييييييييييييه جيت على الجرح..

من جرف لدحديرة..وياقلب لاتحزن,,

تقبّل مروري المحطّم الحزين..

​

 

[صديقة ذوي الإعاقة]

رد: ♥♫ إلى كل سعودية وسعودي ♫♥‎

حنا الشعب السعودي والمثل عندنا يقول خيرنا لغيرنا

 

[شروق]

رد: ♥♫ إلى كل سعودية وسعودي ♫♥‎

[align=center]

صامدون

صامدون

صامدون

الله يعطيك العافيه على النقل اخي بدر
​

[/align]​

 

[بدر بن فهد]

رد: ♥♫ إلى كل سعودية وسعودي ♫♥‎

[align=center]
أميرة الخيال

كيكة إسفنجية

بصمة أمل

شروق

شاكر لكن ردودكن الجميلة.
[/align]

 

[سفير قحطان]

رد: ♥♫ إلى كل سعودية وسعودي ♫♥‎

يعطيك العافيه نقل ولا اروع منه

 

[فورد]

رد: ♥♫ إلى كل سعودية وسعودي ♫♥‎

مبدع دائما أخي العزيز

 

[بدر بن فهد]

رد: ♥♫ إلى كل سعودية وسعودي ♫♥‎

[align=center]
اخواني

سفير قحطان

فــــــورد


شرفني واسعدني مروركم الكريم
[/align]