مقالب الشباب يوم العرس

[الراقي]

الموضوع اليوم عن مقالب الشباب
اللي يسوونها لأخوياهم في أول ليلة زواج !!

هذالشي ليس بحالة نادرة جدا
بالعكس بل هو ظاهرة منتشرة بين الشباب
ولكن تختلف قوة المقلب من شخص لآخر


فيه ناس يكتفون بعمل مقلب ليلة العرس
وفيه ناس يسوون المقلب يوم الزواج
قبل التوجه للقصر او في القصر

لكن مسألة إن المقلب يوصل لسكن الزوجين
وفي أول ليلة !! هذي بصراحة مصيبة


في مجموعة مواقف نذكرها لكم
و نترك لكم تقدير حجم ( المأساة )
في كل موقف !!


الموقف الأول :
بوكيه ورد

هذا الله يسلمكم .. ليلة زواج العريس
كان مجتمع مع اخوياه بالاستراحة
تعرفون بكره زواجه وقال آخر ليلة ابيها مع الشباب بالاستراحة

عاد من ضمن السوالف
قالوا هاه وش تبي نسوي لك مقلب ؟؟
قال لا هين ما تقدرون ..
قالوا شف المقلب مسوينه مسوينه ..
مير تبيه بالقصر والا قبل لا تروح والا بالفندق
الرجال مسكت معه وقال أبد تحدي ..
ماتقدرون تسوون فيني مقلب

تزوج الرجال وتوجه للفندق مع عروسته .. و
توهم داخلين الفندق وجالسين أول ليلة
والفندق مرتب ..

رن جرس الغرفة ..
فتح واثره العامل اللي يشتغل بالفندق
ومعاه سلة فواكه .. هدية من الفندق للعرسان

اخذها وحطها عند العروس ..
جلس شوي ورنّ الجرس مرة ثانية
راح فتح الباب واثره العامل معه بوكيه ورد وفيه كرت

أخذ البوكيه وحطه بالغرفة
على أساس إن البوكيه هدية من الفندق لهم
استأذن زوجته بيدخل دورة المياه - الله يعزكم -
فزوجته كانت تبي تشوف الكرت اللي في البوكيه .. وش مكتوب فيه ..
وكانت الصدمة :

ألف ألف مبروك الزواج .. وأتمنى لك التوفيق في حياتك الجديدة
..أموله..

انهارت الزوجة !!
منهي أموله ؟؟؟
وفي ليلتي ..
تبارك لزوجي وبكل وساعة وجه !!

طلع زوجها من دورة المياه واثر زوجته تصيح وتشاهق ..
وش فيك يابنت الحلال ؟؟ وش صاير ..
عطته الكرت اللي بالبوكيه .. الرجال انهبل ..
قسم بالله ما اعرفها ولا ادري منهي ..
والبنت مسيكينة الدموع اربع اربع !!!
شوي ويرنّ الجرس مرة ثانية ..
واثره العامل معه بوكيه ورد ثاني ومعه كرت
مكتوب فيه :

ألف ألف مبروك زواجك ..
ونتمنى لك التوفيق في حياتك الجديدة
أخوياك بالاستراحة ( أموله )

والرجال يوريها زوجته ..
شوفي قسم بالله انهم اخوياي ..
هم اللي مسوين المقلب ..
وبالأخيرررر اقتنعت البنت !!!

يعني خربوا عليه أول ليلة في حياتهم ..
بسبب هالتصرف !!!!!


الموقف الثاني :
رز بخاري

هذا واحد قرر يتزوج ومشت أموره تمام
قالوا له أخوياه .. ترى لازم حنا نسوي لك شي في يوم عرسك
وترى حنا اللي راح نجيب لك العشاء اذا رحت مع زوجتك للفندق
بنتكفل فيه وبنجيب لكم شي مرررتب


الرجال قال أبد ياشباب ماتقصرون ويكفي شعوركم .. ومن هالكلام
واحد من الشباب قال للباقين ..
تكفون خلوا العشاء علي انا لحالي
الرجال هذا من أعز الناس عندي .. وودي يوم عرسه أجيب له أنا عشاه
وخلونا حنا مرة ثانية نجيب له شي يصير مننا كلنا ..
قالوا دام كذا أجل خلاص

تزوج اخونا وراح مع زوجته
على أساس إن خويه هو اللي بيجيب له العشاء
ويوصله للفندق بنفسه

بعد ماجلسوا فترة بالفندق
رنّ الجرس وفتح العريس الباب وأثره خويه

والمصيبة إنه جايب له العشاء
كيس رز بخاري وبصل وجرجير
ويمدها له وهو ميت ضحك


الموقف الثالث:
النور


هذا واحد تزوج وراح مع زوجته لبيتهم الجديد
والمعاريس جالسين ومستحين .. وصحن فواكه .. وعصيرات
وكل واحد يسترق النظرات .. وطاقتهم أم الركب وحالتهم صعبة !!

شوي الا يطفى النور
وش السالفة .. طلع الزوج وفتح الطبلون حق الكهرب واشتغل النور

رجع مرة ثانية .. وطفى النور .. وراح مرة ثانية وشغله
ومرة ثالثه ورابعه وخامسه !!!

وجلس على هالحالة من 12 بالليل لين أذن الفجر !!!

والسبب ؟؟
أخوياه يبون يسوون فيه مقلب ..
يعني يالله خربوا الليلة عشان هالضحك و الاستهبال
لكن العقبى لهم إن شاء الله



الموقف الرابع :
مقلب عكسي

هذا واحد ذكي
قرر يتزوج .. وقرر أنه هو اللي يسوي بأخوياه مقلب
يعني يتغدا بهم قبل يتعشون فيه

قال لأخوياه انه نوى يتزوج وكذا
وجلس يستعد للزواج
ومن ضمن الاستعدادات .. طباعة كروت الدعوة
طبع كروت دعوة للأقارب والأهل بمكان القصر وموعد الزواج وكل شي .. و

طبع كروت زواج خاصة لأخوياه ..
وكتب فيها موعد الزواج يختلف عن موعد زواجه الفعلي بيوم ...

وكتب فيها ان الزواج بيكون في البيت

الشباب اخذوا البطاقات
وشكلهم كانوا ناوين يسوون فيه مقلب يوم زواجه

طبعا الرجال تزوج وعدت ليلته الأولى من أروع مايكون ..
لا مقالب ولا هم يحزنون

يوم صار من بكره .. اللي هو موعد الزواج الوهمي لاخوياه
لبسوا الشباب واللي راح الحلاق يكشخ ..
وراحوا لبيت المعرس !!

وش السالفة .. غريبة وين المعازيم ؟؟
مافيه الا سيارتين او ثلاث عند الباب !

دخلوا .. ويسلمون على اخوان المعرس
ويجلسون شوي بالمجلس .. ماش مافيه احد .. مب جو عرس !!

ويروح واحد يسأل اخو العريس .. وين فلان ؟؟
قال .. سافر

قالوا وش اللي سافر ؟؟
عسى ماشر بس ؟؟
وزواجه اليوم ؟؟؟؟


قال .. زواجه امس ...
وسافر اليوم الصبح هو وزوجته

وتراه قايل لأهلي
انكم بتجون عقب عرسي بيوم ..
وترانا مسوين لكم عشاء وشغل مرتب ..
والله يحييكم

يعني مساكين
مايكفي الواحد مقلب العرس
كمان يزودونها و يخربونها بها المقالب

مقالب منقوله
و مبروك ألف مبروك
لمن أقدم
و ربي يتمم بخير و على خير
لمن نوى




​

 

[نور]

رد: مقالب الشباب يوم العرس

[align=center]
ههههههههههههههههههههههههههههههه

رووووووووووووووعة والله

عقبال ما نسوي لك مقلب يالرااااقي

بس انتبه وخليك ذكي وفطين :5:
[/align]

 

[زهرة الياسمين]

رد: مقالب الشباب يوم العرس

ههههههههههههههههههههههههههه
مقالب روووووووووووووعه

 

[الحنان كله]

رد: مقالب الشباب يوم العرس

هههههههههههههههههههه مواقف حلووووووه وعقبالك اخوي الراقي هههههههههههه

 

[المغامر]

رد: مقالب الشباب يوم العرس

روعه المقالب امووووووووت فيها

يالراقي سلمت يمينك على النقل الرائع

وابشر بالمقلب الي يبسطك بس علمنا بيوم زواجك مو تعطينا يوم غير

 

[الراقي]

رد: مقالب الشباب يوم العرس

اهلا وسهلا
بمروك الأنيق صدى الإسلام
كل الشكر على هالصوروعلى المرور

 

[الراقي]

رد: مقالب الشباب يوم العرس

اهلا وسهلا بك نور
مو عشان كذا الشباب صار عندهم عزوف
من الخوف من هالمقالب

هههههههههههههههه

كل الشكر على حلو المرور

 

[الراقي]

رد: مقالب الشباب يوم العرس

الله يحييك
سعدت بتواجدك
زهره الياسمين

كل الشكر

 

[الراقي]

رد: مقالب الشباب يوم العرس

الله لايبلانا كل الحنان
مقلبين بالراس يوجعوا

:001_tongue:

فتح الله لك
ممتن لطيب المرور

 

[الراقي]

رد: مقالب الشباب يوم العرس

الله يستر منك
أخونا المغامر

مو منك من إسمك
صبحك ربي بالمسرات
أسعدني تواجدك الطيب ياطيب