قصة حصلت أيام حرب العراق على الكويت

[ابو فواز]

السلا عليكم ورحمة الله وبركاته ​

ما بي أطول عليكم ​

هذي قصه حصلت ايام الأزمة واعتداء صدام على الكويت​

والقصة عجيبة واقرب الى المغامرة بالروح والمال من اجل صديق قديم​

وابطال القصة لا زالوا موجودين واحياء وهم في منتصف العمر ايام ألازمه​

وكنت انا ذلك الوقت في ثانيه متوسط او أولى متوسط وسمعت قصتهم وتعجبت
منها .​

وابطال القصة السعودي والكويتي من قبيلتين مختلفتين وأسمائهم معروفه .​

وقصها لي احد الناس الذي يعرفون الكويتي وقد قصها على رفيقنا بحذافيرها .​

كان السعودي قبل ألازمه بسنين يهرب السلاح قبل منع تجارة الأسلحة وكان​

يذهب لشرائه من العراق وتعرف على احد المواطنين الكويتيين الذي كان ايضا
يتاجر بالسلاح .​

المهم صار في كل رحلة لشراء السلاح يقلط السعودي على الكويتي اثناء ذهابه
واثناء رجعته .​

وكان الكويتي متزوج من مره وحده وصارت تعرف السعودي وصار يقلط في البيت
اثناء غياب زوجها حتى يأتي​

تقلطه في الملحق وتخلي بناتها الصغار يجيبن له القهوة والشاهي لين يجي زوجها .​

قرر السعودي ترك تجارة السلاح وحط أرقامه عند الكويتي وقال ان احتجتني
تلقاني . وكانت تلك آخر مقابله لهم .​

مرت السنين وحصل العدوان الغاشم على الكويت​

وصادف وقوع العدوان الغاشم أن الكويتي كان في السعودية وفي البر في نجد​

ولا كان فيه اتصالات وكان الكويتي معه اكبر عياله وذهب من البر في جنوب​

نجد الى الرياض ووصل الرياض حول العصر ولا يعرف احد في الرياض وتذكر​

بالصدفة رفيقه السعودي القديم اللي كان ساكنٍ قريباً من الدار البيضاء
والحواري هذيك .​

ودور رقمه ولقاه معه في ورقه قديمه اكل الزمان عليها وشرب في بوكه وقال​

ابي اروح له كوده يفزع لي بسلاح اروح اجيب اهلي قبل يصيبهم شيء​

طبعاً كان الكويتي ايام ألازمه متزوج مره ثانيه وساكنه في بيت واحد مع​

مرته الأولى واكثر عياله بنات كبار وأولاد صغار وجنت جنونه خايف يلحق
عرضه شيء​

المهم اتصل على السعودي ولقاه مؤجر بيته وسأل المستأجر عن بيته الثاني​

ودله عليه وكان قريب من بيته الأول​

وآخذ الوصف من المستأجر وراح لرفيقه السعودي ولقاه في البيت عنده عياله​

وسلم عليه وعرفه رفيقه . المهم اخذت الكويتي العبرة وبكى وارتاع السعودي​

وانشده عن السالفة وعلمه .​

وطمنه السعودي وقال الأمور زينه وخلنا نتصل عليهم الحين وانا علي الطلاق​

ما تروح لين تعشى الليلة وعقب ما تعشى ابشر باللي تبي وانا معك على ما
تبي​

ما لقى الكويتي مفر من الموافقة على طلب السعودي ولا سيما انه مرهق له يوم كامل​

اما عن السعودي فقد كانت هذه حيلة منه لإقناع الكويتي بالجلوس والا اللي​

كان في راسه تخطيط ثاني .​

المهم راح السعودي لحرمته وقال عطيني الرشاش وعطيني ذخيرة وعطيني ثلاثين الف ريال .​

ونادى ولده الكبير وقال روح سو الذبايح واذا سأل عني قل ما ادري عن ابوي​

وين راح وان شفته بيمشي مهما تأخرت هبط عزمه . وقل له تبي تمشي وحنا ما​

ندري وين ابونا فيه واقلقوه علي واحرجوه يجلس غصب عشان يستحي يترككم​

وقولوا له ابونا راح يجيب اغراض لك من السوق عشان تروح لأهلك وحنا خايفين​

عليه لا يكون صار له حادث والا شيء​

المهم الكلام هذا كان المغرب .​

السعودي ركب جيبه وقرر المغامرة والذهاب الى الكويت وتعدي الحدود كلها من​

اجل أن يأتي بحريم الكويتي وبناته وعياله الصغار وقال ان مت مت في لازم​

رفيقي وان حييت سلمت من الملامة ورديت له شيء من وفاه​

وصل السعودي الحدود السعودية وكانت الأوضاع بين السعودية والعراق لا زالت​

لا بأس بها يعني قبل تشتب بين السعوديين والعراقيين إذا انتم تذكرون .​

وكان هناك منعاً باتاً بأن لا يسمح لأي سيارة خاصة في دخول الكويت خوفاً​

عليها من الجنود العراقيين .​

ورفضوا يسمحون له بالدخول وقام يمثل عليهم البكاء وان عائلته في خطر وانه​

كويتي الجنسية من اصل سعودي لكن ما معه اثبات ورفضوا .​

اشفق عليه واحد من الجنود السعوديين وناداه على طرف وقال انا ابي اساعدك لكن اسمع .​

حنا عندنا امر نخلي الشاحنات يمرن واذا رفعت البوابة للشاحنة تعال من​

جنبها وازرق ولا تلتفت ترى ما احد طاردك وكل ذال على نفسه وجنود الحد​

العراقيين ما بيننا وبينهم اي علاقة او اي ارتباط .​

المهم نفذ الخطة ونجحت ويوم وصل حدود الكويت اللي يسيطر عليها العراقيين​

رفضوا يدخلونه لين رشاهم بعشرة آلاف ريال سعودي . وخلوه يدخل​

المهم دخل الكويت وهو ذال وساعده على التحرك بحرية انه سعودي وما بعد صار​

بين السعوديين والعراقيين شيء ولا بعد تأزمت الأوضاع بينهم .​

المهم راح عند كبينه ما ادري بقاله وكلم بيت الكويتي وردت عليه مره​

وطمنها وخافت منه وقال انتي من انتي .​

قالت انا مرة الرجال اللي تقول انك جاي من يمه . قال . اجل مرته فلانة وينها ؟​

قالت : وش تبي منها ؟​

قال : اقول عطيني اياها وقولي فلان بن فلان من طرف زوجك يبي يكلمك.​

المهم كلمته المرة الكبيرة (الأولى) وذكرها بنفسه وعرفته وقعدت تبكي​

وسألها : صابكم مكروه والا لا ؟​

قالت حنا بخير والى الحين ما صابنا شيء وبناتنا حاطتهن بالقبو خايفين​

عليها من الجنود اما المال فخلهم ياخذون اللي يبونه والى الحين ما انسرق​

منا شيء والبيوت اللي حولنا سرقت كلها .​

قال : افتحي البايكه لي لأن ما فيه حيل اطق الباب ويشوفوني العراقيين .​

وخلي البنات والعيال يتجهزون وشيلوا ما خف حمله وغلي ثمنه مثل الذهب​

والفلوس والأمور الضرورية والقيمة .​

دخل البايكه وشالهم كلهم وهم كلهم يتباكون . وكل واحد منهم خايف لا​

يوقفونه العراقيين .​

ويوم اقبل على المركز العراقي من جهة السعودية خاف على البنات منهم وحبل​

الرشاش (يعني عباه بالذخيرة) تحسباً لأي شيء وطمعهم بكل الفلوس اللي معه​

وهي عشرين الف وعطاهم اياها .​

ومن ثم جاء للمركز السعودي ودخلوه لأن اللي جاي يسمحون له بالدخول ولا​

سيما انه معه عائلة .​

المهم يوم اقبل على الحفر وكانن الحريم نايمات صحن وقالن حنا وين ؟​

قال: حنا في السعودية . وقامن يبكن من الفرحة . وهو كان له يوم ما رقد​

وقال لهن نبي نرقد هنا وقامت المرة الكبيرة ووصت واحد من عيالها الصغار​

وخلته يحط له فراش يرقد عليه اما هن ما جاهن النوم .​

المهم قام على شعة النور وقومهن (صحاهن) وقال اركبن نبي نمشي .​

اما بالنسبة للكويتي فهو وسوس وصار بين نارين . نار رفيقه اللي راح يبي​

يجيب اغراض الرحلة ولا يدري هو ميت والا حي وبين نار اهله اللي ما جلس​

الا يبي يتجهز عشان يجيبهن .​

ونجحت خطة السعودي معه في ابقاءه في البيت .​

ما قال مؤذن الظهر الله اكبر .​

إلا والسعودي في بيته ويقوم رفيقه الكويتي ويقول له ابشر بأهلك والكويتي
منذهل ولا هو مصدق​

وكان اهل السعودي ايضا خايفين على ابوهم ولا يدرون هو يرجع حي والا ميت .​

ويوم تلاقت عائلة السعودي والكويتي صار البكاء السمة الغالبة على الجميع​

حتى اهل السعودي من زود الفرح والنجاة .والمنجي هو الله سبحانه وتعالى .​

وقد قال احد الشعراء ابيات في هذه القصة ما احفظ منها إلا هالبيتين:​

بيض الله وجه من جازف على شان الرفيق
يوم بعض الناس ما يغني رفيقٍ شانها​

عند دمعة صاحبه عاف الحليلة والصديق
صارع السبع الفيافي والنضا بارسانها​

في ظلام الليل الأسود لا ملاذ ولا طريق
ساق روحه لأجل يرضي صاحبه لأكفانها​

وانا اقول:​

هذولا هم الرفاقه ولا بلاش​

,,,​

ماشاء الله عليه فعلاااااا رجال​

عجبتني القصه و حبيت أنكم تقرونها ​

و ان شاء الله تنال على إعجابكم​

((منقول))​

 

[تتباشير]

رد: قصة حصلت أيام حرب العراق على الكويت

قصه رراائعه عجبتني حيييل

والنعم الاصدقاء

الف شكر اخوي نقلها لنا

يعطيك العافيه

 

[إحسـاسي]

رد: قصة حصلت أيام حرب العراق على الكويت

قصه رائعه جدآ
وصغتها باسلوب اروع اخي ابو فواز
استمتعت بها
ماشاء الله تبارك الله؛ من جد بيض الله وجهه
هذا الصديق وقت الضيق"
صداقه وحب وفاء وتضحيه
رب اخ لك لم تلده امك
واجمل مافي الحياة الصداقه
اسعدك الله ابو فواز؛؛​

 

[ابو فواز]

رد: قصة حصلت أيام حرب العراق على الكويت

الاخت​

تباشير الصباح​

مرورك عطر متصفي الله يعافيك​

 

[ابو فواز]

رد: قصة حصلت أيام حرب العراق على الكويت

آمين واسعدك وكل مسلم​

الاخت​

إحسآسي​

مرورك الأروع شرفني واسعدني شكرا​

نعم​

رب اخ لك لم تلده امك
واجمل مافي الحياة الصداقه​