قصيده من ذهب

[مجروح الكبيده]

يا متعب الأقدام ماشي على وين
مـع جَـرّةٍ جاهـا العجـاج ودفنهـا

أرجع وعـدّ خطـاك وحـده وثنتيـن
واكبح جماح النفس والزم رسنهـا

لاتامن الدنيا تـرى وضعهـا شيـن
ماعـاد بـه دنـيـا صحـيـح بدنـهـا

لاصاروا العقّـال مثـل المجانيـن
واصبح ردي العرف يامر وينهـى

أنا مجـرّب والتجـارب براهـيـن
أراهـن الأيـام وأكـسـب رهنـهـا

منها عرفت الفرق بين الفريقين
سبحان من صاغ العقول ووزنهـا

وان كان صح ان التجارب براهين
ضمنتهـا إن كـان ربـي ضمنـهـا

رفقة ردي المعرفـة بعتهـا ديـن
على زبـونٍ ضمّـهـا واحتضنـهـا

بغى يجيني بالثمن قلت بعدين
امسك فلوسك لين ننشـدك عنها

مابعتك الاّ سلعةٍ يا أحمر العيـن
ابيعـهـا وابـيــع حـتــى ثمـنـهـا

بعض المواقف من وراها محاصيل
تكشف لك إسدود الرجال وخبرها

يا تكسب قروم الرجال المشاكيل
والا تجي من دونــها وتخسرها

الكلمه العليا وجزل الأفاعيل
تغنيك عن سبـع البحــور ودررها

وما دامها ما وصلت الحط والشيل
فاصمل وإذا راد الولي تقــتدرهـا

قولة ( كفو ) تتعب عليها الرجاجيل
اللي على روس النوايف نظرها

يا كثر صدقان الصحن والمعاميل
ويا قلهم لامن تقادح شررها

إعلم ترى الخوه فعول وغرابيل
في دورة الأيام يجنا ثمرها

بعض العرب للتمشيه والتساهيل
وبعض العرب للمعضلات وخطرها

أحدن توصل به بعيد المواصيل
وإذا معه لك حاجتن ما ذخرها

وأحدن هبيل ويحسب إنّا مهابيل
نستر عيوبه والله اللي سترها

ظهره ظهر عقرب وبطنه بطن فيل
ووقفات سمحين اللحى ماقدرها

 

[الصبر]

رد: قصيده من ذهب

رحم الله الشاعر الكبير رشيد الزلامي وغفر له
ولاهنت علي نقـله

 

[ابو فواز]

رد: قصيده من ذهب

إعلم ترى الخوه فعول وغرابيل
في دورة الأيام يجنا ثمرها

بعض العرب للتمشيه والتساهيل
وبعض العرب للمعضلات وخطرها

ابيات رائعه جدا ومعبرة
رحم الله الشاعر رشيد الزلامي
تسلم يمينك اخي مجروح الكبيده
احترامي وتقديري لك

 

[الحنان كله]

رد: قصيده من ذهب

صح لسان شاعرها وعلا شأن ناقلها