قصيدة حافز .. بين زوج وزوجته..!

[اسامه الصاعدي]


‏​‏​قصيده من رجل لزوجته
((بمناسبة حااااااافز))

تكفين يابنت الأجاويد تكفين
نبي سلف ولانبيها معوونه!
أما عطيني الألف ولا الألفين
مادام حافز قاموا يوزعونه!
وانا ترى أستاهل ولاني معك شين
ومعروفي الأول ترى تذكرينه
اما شرينا به شياه وبعارين
والا به المديون يخلص ديونه
ردي عليه بالخبر وش تقولين؟
عسى أبو عيالك ماتخيب ظنونه
............................
((- ردت زووجته -))

توك بديت تميز الزين والشين
يومن حافز قاموا يوزعونه!
أول تمن علي بعشره وعشرين
ولسانك يلعلع علي بالمهونه
مامن سلف عندي ومامن بعارين
ومامن شياه وماأعرف المعونه!!
أبي أروح السوق أشري فساتين
وأشري جزم وشناطمن نفس لونه!
وأبشتري مكياج وساعه وعطرين
وأبشتري آيفون زي آيفونه!
ويابو عيالي لو كثر عندك الدين
ترى الرجل لازم يسدد ديونه!��



---

 

[ابو فواز]

رد: قصيدة حافز .. بين زوج وزوجته..!

محاورة رائعه اخي اسامة
والله حافر لخبط الاوراق وكشف المستور هههه
والنفوس اليا بغيـت اتعرفهـا ارم الفلـوس
تقييمي وتقديري لك

 

[غيوم المساء]

رد: قصيدة حافز .. بين زوج وزوجته..!

قصيده رائعه اخوي اسامه هههههههه:thumbup: هنا انكشفت الاقنعه بين الازواج وبدا البخل يبين الله يصلح الشان لوهي تدينه الف يشتري بعارين ولانياق يحطها بالمزاين :icon_ninja::shiny02: تسلم يدك من تميز لتميز لك تقديري

 

[نجمة مسافر]

رد: قصيدة حافز .. بين زوج وزوجته..!

مشكور على هالمحاوره الممتعه :lol:
الي أشوفه إن الحياة الزوجيه تقوم على التفاهم والتعاون لكن مهوب لدرجة الاستغلال و الحرمه مهيب مجبوره تعطي إلا برضى نفس وبصراحه عيب يكون الزوج عيونه على هالمبلغ القليل إلي لو قارنّاه باحتياجات الحرمه الشخصيه مع علمنا إن كل شي غلا فمهوب باقي له أصلاً شي عشان ياخذه وحفظ ماء الوجه زين :icon_sweatdrop:
المشكله إن بعضهم ماخذ بطاقة الصراف يعني فلوسها ويتصرف فيها تقول حنفيه قاعده تنقّط والله شي يقهر و بعضهم يتسلف منها لو بقى شي و تضطر الزوجه أحياناً تأجل شراء أشياء محتاجتها ويقول برجعها و قابلوني إن شافتها وبعضهم ما ياخذها ولا يطلب شي بس صار يوكل زوجته لهالمبلغ ولا عاد يصرف عليها مثل أول ولو احتاجوا العيال شي قال ادفعي إنتِ وأعطيك بعدين ونفس الحكايه :thumbdown: وهذا من أكبر مساوئ حافز من وجهة نظري لأن الزوج مجبور على النفقه على الإثنين ومهوب شي إختياري
طبعاً ما نعمم هالنماذج السيئه على كل الأزواج لكن نسبه كبيره منهم كذا
على قد ما شال حافز بعض العبء عن الأسره في المصاريف لكن تسبب في توتر العلاقه بين أكثر الأزواج وحتى الحرمه مع أهلها وهذا شي لا يمكن ننكره
الله يصلح الأحوال

 

[الحنان كله]

رد: قصيدة حافز .. بين زوج وزوجته..!

ههههههههههه


حوار جميل


مشكور اخوي