قصيدة الشاعر ((فلاح بن عريج المطيري)) بالنساء المتزوجات

[ام زيد]

قصيدة الشاعر ((فلاح بن عريج المطيري)) ​

بالنساء المتزوجات ​

بعض النساء تجلب على بيتك الخيـر ** والبعض منهن لـك تجيـب النكـاده


والبعض منهن مثل وصف النواويـر ** ومع العقل والزيـن فيهـا الركـاده


والبعض منهن يستر الحـال تستيـر ** لوهي تعيش العمـر صبـر وجـلاده


والبعض منهن عقلها يـوزن النيـر ** ومعها على تـاج الرزانـه شهـاده


وبعضهن احلى من حليـب المغاتيـر ** واحلى من الطايـف ونفحـة بـراده


وفي مجتمعها تمشي ابحسـن تدبيـر ** عقـلٍٍ رزيـن وفـي حلاهـا زيـاده


وبعضهن اينومسك عنـد المساييـر ** والبْـن فالدلـه اتظـبـط اقـنـاده


وبعض اللسنتهن مثل وصف المناشير ** والبعض منهن طايـشٍٍ فـي عنـاده


والبعـض منهـن فكرهـا بالدنانيـر ** قشـرا وشوشتهـا سـواة العـراده


والبعض منهـن مايكـب المشاويـر ** وفيها التغطـرس والغبـاء والبـلاده


وهذي هي اللـي تستحـق البواكيـر ** حيـث انهـا للسـوق فيهـا عبـاده


والبعض منهن عايـشٍٍ دون تفكيـر ** وان شفتها منتـه ب ويـا السعـاده


وان رحت عنها ولعت فوقك اسعيـر ** وشنت عليك الحرب حـرب الابـاده


واللي ماصار اترهمه غصب ويصيـر ** ومـن جورهـا لازم تـزور العيـاده


والبعض منهن دايم اقدامهـا اتسيـر ** علـى امـهـا والام راس القـيـاده


وتنفـذ اللـي تسمعـه دون تاخيـر ** وترسم امخططهـا لفـرض السيـاده


واليا حصل من بينكم شـيٍٍ اصغيـر ** تفيـد منهـو ماطلبـهـا الافــاده


وتوافـي اهلهـا بـكـل التقـاريـر ** ليـن الرجـل يعـاف شربـه وزاده


واليـا ظربهـا كـف مالـه معاذيـر ** راحت هو ياكل عشاء البيـت سـاده


راحت طمـوح وبلشـوه العصافيـر ** ومن همهم حـارب منـام الوسـاده


وان جاء يرجعهـا عيونـه مطاييـر ** قالوا قبـل ترجـع تجيـب القـلاده


وسبحه من الأربش وأطقم أساويـر ** ومن جورهـن لا واعنـاه وهجـاده


وان كان ماانسابك ارجـالٍٍ مناعيـر ** هيجـن وهوبـل ياحيـاة الـقـراده


وارجو السموحه من جميع الغناديـر ** وهن الأصل منهـن للاقطـار سـاده


ومصنـع رياجيـلٍٍ تقـود الطوابيـر ** والحـرب تقـدح للمعـادي ازنـاده


والمعذره وان كان بالقـاف تقصيـر ** وماكل من يجهد نجح فـي اجتهـاده


وللكلمه الجزلـه زبـون وجماهيـر ** وقول بـلا حكمـه مافيـه استفـاده


والله يجعل لي مـن الذنـب تكفيـر ** يوم ان راع الـزرع يلقـا حصـاده​

 

[الحنان كله]

رد: قصيدة الشاعر ((فلاح بن عريج المطيري)) بالنساء المتزوجات

قصيده جميله


يسلمو قلبو ام زيد

 

[ام زيد]

رد: قصيدة الشاعر ((فلاح بن عريج المطيري)) بالنساء المتزوجات

اسعدني مرورك يا أختي