سامح وصافح والجفا ماهو بزين

[ابو فواز]

سامح وصافح والجفا ماهو بزين

طبع البشر تخطي وتنسى خطاها

لا تقول حنا صح والناس مخطين

خاطب عقول الخلق في مستواها

والله لو الشين تجزاه بالشين

لتبطي جروحك ما تلاقي دواها

بالذات لاجا الجرح من ناس غالين

اصبر وتلقى عند ربي جزاها

اما من الاقراب والا البعيدين

مدامها تمشي تجمل معاها

وان كان ما يرضى بها الشرع والدين

ما هو لزوم الخلق تكسب رضاها

الله ولا الذله وطرد المقفين

تهدم صروح العز للي بناها

ابعد وتلقى في غناتك محبين

بيض القلوب الله يسعد مساها

علي الغلا والطيب دايم وفيين

وان غابو الاجواد يحضر نباها

وعيش العمر لايام وشهور وسنين

والنفس لا تغرك وتتبع هواها

لاشك ما حنا على الدار باقين

لابد ما نرحل ونسكن ثراها

الكامل الله خالق العبد من طين

والا البشر تخفي عيوبٍ وراها

حنا العباد وتحت ربي مساكين

وسود الليالي ما عرفنا خفاها

نخطي ونتكبر ونمشي علي وين

والناس تتلحق بعضها بقفاها

احدٍ يجيك بوجه واحدٍ بوجهين

ناس على الزله وش اللي حداها

يا ويلهم في يوم عرض الموازين

اعمالهم كل الخلايق تراها

اما علي دار الجنان وسعيدين

ولا علي دار الجحيم ولظاها

من ما راق لاخوكم

 

[فديه]

رد: سامح وصافح والجفا ماهو بزين

انتقااا رائع
تسلم ايدك

 

[ابو فواز]

رد: سامح وصافح والجفا ماهو بزين

الله يسلمك اختنا فديه
شرفني مرورك الاروع بارك الله فيك
احترامي وتقديري لك

 

[الحنان كله]

رد: سامح وصافح والجفا ماهو بزين

صح لسان شاعرها


وعلا شان ناقلها

 

[الصبر]

رد: سامح وصافح والجفا ماهو بزين

سلمت على روعه طرحك ... بارك الله فيك ... يوما بعد يوم تتوضح وتتجلى لنا مواهبك وإبداعك والفكر الراقي الذي تحمله.اخي ابوفواز

 

[ابو فواز]

رد: سامح وصافح والجفا ماهو بزين

حياك الله اخي اختنا الحنان كله
شرفي مرورك الله يعطيك العافية
احترامي لك

 

[ابو فواز]

رد: سامح وصافح والجفا ماهو بزين

الله يسلمك من كل شر اخي القدير الصبر
شرفني مرورك وكلامك الطيب واسعدني
الرقي والروعة في تواجدك لا عدمناك
شكري واحترامي وتقديري لك