شف كيف توصيات الاولين

[محمد علي المطرب]

زمان كانت الام والجده عندما يأتي نصيب ابنتهم يعطونها توصيات ونصائح :-

شوفي يابنيتي اذا دخل عليس رجلس لايشوف الا كل شي زين ونظيف بيتس نظفيه مواعينس ادهجيها دهج وقوم قبله قبل صلاة الفجر وشبى على البريز وزهبى قهيوته و اذا جدع وقهويته اطمري وجيبي فطوره ان حصل صبيب والا مريصيعات تراها بتجوزله و ثم خدري ذاك الشاهي اللي يطير في الراس واذا جاء يطلع ادعي ان الله يوفقه ويسمت دربه و لا يجي الا وانتي مصلحة غداه وان كان اهنا حر هفي عليه بالمهفه ولا تقرقعين بالمواعين اذا جيتى تغسلينها اخاف انه يبي يغفي عقب الغدا وبعد العصر صلحي له الشاهي و لاتطلبين منه شي يضيق صدره ان جاب شي و لا تقولين شي ترى الرجاجيل مايحبون الحرمه راعية الجرجه واذا صلى العشاء وجاء خلي عشيه قريبي و فريشه ان كان قيظ وبتمرحون في السطح افرشيه في السطح مبسره عشان المطرحه تبرد وتفحصيها وتمقليها لافيها شي من خشاش الارض وان سان انه شتى حطي بشته الوبر حوله ان كله البرد الا يتلحف به زود على كنيبله شفتى يابنيتى والله ان يدعلس وبتشوفين الخير ان شاء الله

 

[الامل المتجدد]

رد: شف كيف توصيات الاولين

يوه احس اني قدام التلفزيون ابيض واسود
او الجنادريه
بس من جد كلام ولا كتب التربيه الحديثه ما يوصلونه
بس مافهمت (افرشيه في السطح مبسره )
والباقي مصطلاحت متداوله بعض الشئ

 

[آهة وصمت]

رد: شف كيف توصيات الاولين

[align=center]كفووو والله
اي والله هذي التوصيات والا فلا

مو هالايام سواق خدامه بيت بروحتش سفرات
واخر شي يفكرون فيه الحياة الزوجيه الصحيحه [/align]

 

[فالح عبدالله الهاجري]

رد: شف كيف توصيات الاولين

حتسي العرب الاولين له طراه ولذه ماهوب عيال النيدو
هههههههههههههه

 

[مبارك الدوسري]

رد: شف كيف توصيات الاولين

يا سلام هذه التوصيات و الكلام السنع
لكن هل فيه بنات هذه الايام كذا ...........

الان مافيه الا توصيات اسهم هههههههههه

 

[احلاهم واتحداهم]

رد: شف كيف توصيات الاولين

والله هذي المراءه السنعه
بس زمان اول تحول

 

[محمد علي المطرب]

رد: شف كيف توصيات الاولين

لاتحرملني منهم ولا من تفاعلهم ( يازينكم كذا وانتم مجمعين على الخير ان شاء الله )

 

[محمد علي المطرب]

رد: شف كيف توصيات الاولين

يوه احس اني قدام التلفزيون ابيض واسود
او الجنادريه
بس من جد كلام ولا كتب التربيه الحديثه ما يوصلونه
بس مافهمت (افرشيه في السطح مبسره )
والباقي مصطلاحت متداوله بعض الشئ

مافيه مشكله انا اوضح لك المعاني
افرشيه ( يعنى الفراش مطوي عن الغبار وقبل النوم يفرش فرشا مبرحا هههههه )
السطح ( وهي المنطقه التي تكون دور ثاني بس ومكشوف برضه ههههههه
مبسره ( وهنا مربط الفرس )
مبسره تعني ( ان يفرش من وقت مبكر يعنى قبل النوم بساعتين او ثلاث وفي روايه اخرى يقال من بدري عشان يبرد لانه في السطح والشمس لاعبه فيه ويكون ساخن )

 

[الامل المتجدد]

رد: شف كيف توصيات الاولين

مبسره تعني ( ان يفرش من وقت مبكر يعنى قبل النوم بساعتين او ثلاث وفي روايه اخرى يقال من بدري عشان يبرد لانه في السطح والشمس لاعبه فيه ويكون ساخن )
_________________

ههههههههه
احسبيه شئ ينحط تحت المطرحه عن الغبار ( من زود السناعه)

ما شاء الله عليهم