يازين وقت فات ماهوب هاللحين, رائعة

[صديقة ذوي الإعاقة]

[color="navy"[color="navy"]]يازين وقتن فات ماهوب هالحين ،، يوم النوايا كلهن صافياتي

والحقد مايوجد ودايم سعيدين ،، ونفوسنا سمحه وسكر نباتي

وبيوتنا ونسه ولا به شياطين ،، مايدخله صوره ولا منكراتي

ويطرد ظلام الليل عنا سراجين ،، واحيان يقضي قازهن طافياتي

مشروبنا صافي من البير والبين ،، ماهوب مستورد سريع الفواتي

ماصنعوه الغرب يافالهم شين ،، مابه مواد الحفظ ومسرطناتي

وعيشنا مرقوق بين العشاوين ،، تحطه امي قبل وقت الصلاتي

لقمه هنيه طيبه طعمها زيـــن ،، تحوفها بيدينها الطاهراتي

ثمن ننام الى قضينا مصليـــن ،، بعد العشا كلن يريد المباتي

وامي تنومنا بزين السباحيـــن ،، سوالفن من عندها طيباتي

ننام من بدري ونصحى نشيطين ،، بعد الشروق اشغالنا جاهزاتي

مابه كسل لاشغالنا مستعدين ،، ماعندنا سايق ولا خادماتي

نلبس بيوم العيد ثوب السباهين ،، وام تحنينا نماري البناتي

مقيـــالنا بمجببــــن بيـن بابيــن ،، فيه الهوا يطرق جميع الجهاتي

نشب نارن بالشتاء ومتدفيـــن ،، مافيه دفايات ومكيفاتي

يجي المطر وثيابنا تمتلي طين ،، ونلعب جميع عيالنا والبناتي

يصب مثعبنا ونملى المواعيــن ،، ياحلو ذاك الما وذيك الحياتي

ماهي حياة الحين ياشين هالحين ،، كله غثا وهمومنا كاثراتي

وصلاة ربي عد ماترفع يديـــن ،، على محمد صاحب المعجزاتي


[/color]

 

[غيوم المساء]

رد: يازين وقت فات ماهوب هاللحين, رائعة

الله الله وصح لسانك ولسان قائلها اختي بصمة فتاه روووعه روووعه :thumbup: وصدق الشاعر ماصنعوه الغرب يافالهم شين .اختيار مميز بانتقاء القصيده الرائعه هذه التي تعبر عن زمان اول راحو الطيبين تسلم يدك ذوق.:shiny02:

 

[صديقة ذوي الإعاقة]

رد: يازين وقت فات ماهوب هاللحين, رائعة

امين جزاك الله خير سبحان الله قديمك نديمك

 

[غيوم المساء]

رد: يازين وقت فات ماهوب هاللحين, رائعة

صدقتي موفقه باذن الله

 

[ابو فواز]

رد: يازين وقت فات ماهوب هاللحين, رائعة

صلى الله عليه وسلم

يصب مثعبنا ونملى المواعيــن ،، ياحلو ذاك الما وذيك الحياتي

ماهي حياة الحين ياشين هالحين ،، كله غثا وهمومنا كاثراتي

الله الله جت على الجرح الله يسقيك ياذيك الايام ،صدق من قال قديمك نديمك
ابيات روعه بكل ما تعني هذه الكلمة من معنى سلمت يمينك اختنا بصمة على هذا الطرح
لو ايقونة التقييم موجوده قيمت هذه الابيات تستاهل
تقييمي واعجابي وتقديري لك

 

[صديقة ذوي الإعاقة]

رد: يازين وقت فات ماهوب هاللحين, رائعة

جزيتم الجنة وكلام واقعي

 

[الصبر]

رد: يازين وقت فات ماهوب هاللحين, رائعة

وعيشنا مرقوق بين العشاوين ،، تحطه امي قبل وقت الصلاتي

لقمه هنيه طيبه طعمها زيـــن ،، تحوفها بيدينها الطاهراتي

ثمن ننام الى قضينا مصليـــن ،، بعد العشا كلن يريد المباتي

وامي تنومنا بزين السباحيـــن ،، سوالفن من عندها طيباتي
ماأجمل تلك المشاعر التي خطها لنا قلمكِ الجميل هنا لقد كتبتِ وابدعتِ
اختي الكريمة
حفظكم الله ورعاكم وسدد خطاكم.. وأنار الله قلوبكم بالإيمان والتقوى

 

[صديقة ذوي الإعاقة]

رد: يازين وقت فات ماهوب هاللحين, رائعة

جزاكم الله خير في الصميم