بسم الله الرحمن الرحيم

السلام عليكم ايها الاعضاء الكرام ..


تتواصل سيناريوهات .. المعاناة من قبل المراجعين واولياء الامور من تعامل

بعض الموظفين ( مثل ما سبق وان طرحت الموضوع اختي .. الحنان كله )

لكن اليوم المشهد كان مختلف .

انا جالسة اكتب الموضوع الان ومالي تقريبا نصف ساعة من رجعت

من مكتب الشؤون الاجتماعية بجدة ( مصيفة خخخخ لاني ما احب الزحام )

ويا طويلين العمر وانا جالسة مع الموظفة اللي تكتب البيانات الا ام ( ما هي كبيرة في الثلاثين يمكن )

داخلة بعد ما نادوا رقمها معي او بعدي - والله مدري - المهم ومعها بنتها المعاقة ( تخلف عقلي )

وهالني ذلك المنظر للبنت صراحة . تخيلو البنت اطول من امها ولا هي لابسة عباية ولا حتى طرحة

على شعرها . لابسة قميص المنزل . الادهى انها حافية القدمين ( والله العظيم هذا ما رايت بام عيني )

قلت في نفسي ( المفروض تلبسها طرحة او حذيان على الاقل )

المهم لما جات للموظفة طالعت في الفتاة باستغراب وسالت الام : انتي امها ؟ قالت نعم .

قالت لها : حرام عليك مخليتها بهذا الشكل .كيف انتي امها تجيبيها بهذا الشكل اجل الاعانة اللي تاخذوها

ايش تسوون فيها . اخذت اصوات الموظفات ترتفع في الغرفة على هذه الام والبنت ياعيني واقفة تتلفت

ردت الام : انا ما اطلعها من البيت اصلا؟ قالت لها ليه ما تلبسيها حذيان ؟ قالت : انا ما افتكرت انها بتنزل من السيارة ؟؟؟؟

قالوا لها حتى ولو في البيت كيف تدخل الحمام ؟ هل عاجزين تشترون لها لو شحاطة ؟المفروض

اعانتهاتنفقونها عليها وعلى احتياجاتها وتعليمها .

وقالت الموظفة : انا اسفة يجب علي ان اكتب محضر بهذا الموقف حتى يقطعون عنكم الاعانة مدام

تعاملوها بها الشكل . واخذت اوراقها وبدات بالكتابة وانا وكل اللي في الغرفة نتفرج !!!

واخذت الام تترجى وتتعذر .

بس الموظفة فيها خير والله عارفين ايه اللي خلا الموظفة تتخلى عن فكرة المحضر ؟

طلبت من الام خلع الحذيان - اكرمكم الله - واعطتها للبنت وقالت للام تطلعين قدامي وتركبين السيارة

وانتي حافية مثل ما خليتي بنتك تمشي حافية .

وفعلا خرجت الام وتتبعها الموظفة وانا بعدهم ولم تدخل لمكتبها حتى رات البنت ركبت السيارة بالحذاء




وفي داهية امر من كذا ؟؟؟؟؟؟؟؟؟؟ في السيارة توجد لها اخت معاقة كذلك بنفس الحال .

( انا كنت اراقب الموقف ههههههه)


ايه رايكم بالله في هذه الام وهذا الاب اللي يمكن يستلمون هذه السنة ( 40 ) الف وبناتهم بهذا المنظر ؟

حرموهم من اقل حقوقهم لاجل انهن معاقات ؟؟

سامحوني طولت عليكم .. لكن والله اني كنت مقهورة على هاتان الفتاتان .