{وضــــــــــــح النوايا} كيف صارت خطيه؟؟!

[الفرحان]

ساقت مشاوير الشقاء واردف الليل
وسريت ودروب السهر سرمديه
أزريت اسوق الهم واحط واشيل
وتعبت أكابر والمواجع نديه
الحيل مل من التعب مابقى حيل
والجفن ماله بالسهر مقدريه
البهذله والمهزله والغرابيل
أبطال وسنين العمر مسرحيه
والهم والحرمان والحزن والويل
ضيوف وجروح الوفاء شاذليه
والصمت والهوجاس بوح التعاليل
والخوف مسرى والليالي مطيه
يالله عسى درب السنع بالمقابيل
والا الليال اللي مضت جرهديه
حر<ن>كفخ واستأسرته المحابيل
وعقب السما الرحبه هوى للوطيه
حر<ن>غدر فيه الزمن والمداخيل
مقـــــــــــرود وكفوف العطايا رديه
غلطة عمر منها جنيت البهاذيل
وذنوب غيري قالوا الناس ليه
غلطه ودحدرها القدر بالمحاصيل
ورضيت بالمقسوم غصب<ن> عليه
تناقلتها شلة القال والقيل
وحطوا عليها لين صارت قضيه
وقامت تناهشني رخوم مهابيل
أهل الملامه والعلوم الرديه
اللي تجيك أخبارهم بالتفاصيل
ويحرفون الهرج عن سوء نيه
بالله قلي ياسود الوجه ياليل
وضــــــــح النوايا كيف صارت خطيه؟
قل لي من اللي ضلل الحق تضليل؟
ومن علم الوافــــــــــي يخون بخويه؟؟
ومن بروز الاوهام خدعه وتمثيل؟
ومن طلسم الواقع؟وخان الوصيه؟
من قال لي ..دربك مهود .. وتساهيل
ومن علم الضحكات تمشي عليه؟؟
من كفن دموع الوفــــــــــاء بالمناديل؟
ومن هو جزاء الحسنه بمليون سيه؟
اللي قتل حلم الضلووع المناحيل
وقال انقتل فيك العوض والبقيه،،
جـــــاوب سؤالي ياسود الوجه ياليل،،
وضــــــــح النوايا كيف صارت خطيه؟

[الحنان كله]

رد: {وضــــــــــــح النوايا} كيف صارت خطيه؟؟!

اللي قتل حلم الضلوع المناحيل^وقال انقتل فيك العوض والبقية .مميز دائما اخوي الفرحان يعطيك العافية

[الفيلسوفة]

رد: {وضــــــــــــح النوايا} كيف صارت خطيه؟؟!

من كفن دموع الوفــــــــــاء بالمناديل؟
ومن هو جزاء الحسنه بمليون سيه؟
اللي قتل حلم الضلووع المناحيل
وقال انقتل فيك العوض والبقيه،،


ياليت نلقى الاجابة ...........

اشكرك اخوي الفرحان مميز ..

الفيلسوووفة ..

[الفرحان]

رد: {وضــــــــــــح النوايا} كيف صارت خطيه؟؟!

الله يعافيك اختي الحنان كله والله ما سوينا أي شيء تستاهلون اكثر ياأحبتي الكرام . واشكرك على مرورك الكريم وتشريفك لمتصفحي .. واشكرك اختي الفيلسوفة على مرورك العاطر وتشريفك الجميل ...