يالله شفني ضارب اخماس يالله
عاقل مداري عاقلين المسافيه
يالله ليلي كله اعماس يالله
جفني سرقه اللي عن النوم حاديه
يالله كن قلبي بمحماس يالله
غيضي لو انه بالبحر مايغطيه
يالله والوسواس خناس يالله
ضعاف النفوس ان صوت لها تلبيه
يالله والنمام بلاس يالله
حتى الردا عاف الردا من حكاويه
يالله قول الحق نبراس يالله
والزور ماتلفي عليه المشاريه
يالله والميقاف حساس يالله
خايف اكبر شخص قدره مواطيه
يالله من لا داس ينداس يالله
وانا جدودي سعد منهو تخاويه
يالله وارث عز دقباس يالله
عرقي رشيدي عبس غطفان تاليه
يالله ماني ضعف محتاس يالله
لكن بليس اعوذ منه وطاريه
يالله ماغيرك ترى حاس يالله
بسلم امري لك من غيرك ارجيه
يالله كانه ظالم الناس يالله
انك توريني بعض قدرتك فيه
يالله كان الي معه انجاس يالله
انك تبلواهم بلا من بلاويه
يالله كانه رافع الراس يالله
انك بعين الناس راسه توطيه
يالله كانه ميت احساس يالله
انك عليه اتموت احساس اهاليه
يالله كانه يحطب بفاس يالله
انك تخلي الفاس يحطب اياديه
يالله كان بعزوته باس يالله
انك تسلط قو باسه حواليه
يالله كانه يملك الماس يالله
انك تذوقه الفقر في لياليه
يالله كانه ساتره ساس يالله
انك تهدم الساس حوله تعريه
يالله كانه ماشكا الياس يالله
انك تحده دايم الياس يشكيه
يالله كانه جاك عساس يالله
انك على نيته بالناس تعطيه
يالله كانه بالي الناس يالله
انك مثل مايبلي الناس تبليه ___