. ياهاجسي بالوصل خفف وجع راسي
النفس تتعب وضاقت من معاتبها

ارخ الوصل والعذر لاصرت منحاسي
يمكن بوصلك تحقق لي مطالبها

الضيقه اللي تباري مدخل أنفاسي
تضرب بصدري وتشهر في مخالبها

واقلبي اللي مراحل نبضك أتعاسي
صارعت دنيا تقدم لك نوايبها

لاجيت ابقطف ثمرها بان لي ياسي
واشغلت نفسي ب كيف أنهي صعايبها

خاويت فكري وقدمته على ناسي
حتى لساني حروفه مايحاربها

أجلس واسامر همومي والكدر كاسي
اشرب نكد واتنفس من هبايبها

فنجال حزني يمسيني وجلاسي
انا وفكري وضيق البال صاحبها

أجول في عالم الأفراح متناسي
اضحك ثواني ومدري وش عواقبها

تعبت أجاري زمان ٍ واقعه قاسي
اساير الوقت مع دورة عقاربها

دونت معنى الكآبه وسط كراسي
وخليت حبر الحزن يرجع ويكتبها

يالله فرج همومي واطرد عماسي
وانته ياربي ظنوني ماتخيبها .