بسم الله الرحمن الرحيم

نص بعد حادثة الخميس رحم الله من قضى وعجّل بشفاء من اصيب والله يعوّض من خسر .




آه يا شرق الريّاض وآه يا صبْح الخميس وآه يا ذا الإنفجار
ما ظهر لون البياض ومن ضحك كل . ن . تعيس وكلّ سهْل اصْبح عسير !!
يا هو هالمنظر مخيف وهز ذا المنظر قلوب وكل ّ شي جاه انْهيار
وصاب كل عين . ن . نزيف وصاب كل وجه . ن . شحوب وصاب كل عقْل الكثير !!
بعد ما صار انْدماج وكلّ لحم . ن . مع حديد وعن يمين وعن يسار
واللّي كنّه فوق صاج ولا لقى مخْرج وحيد ولو هو ابْمخرج صغير !!
من سبب تهريب غاز ودوّا في لحظات صوت ولا عطى وقت انتظار
يا هروب ويا احْتجاز وبين جرحى وبين موت ومن في هالموْقف خبير !!
شي من رب العباد وما يبي لازم يكون وما حدث بس اخْتصار
ولو يبي للنّاس أباد وقبل لا تلمح عيون ولو مثل هذا خطير !!
ونحمد اللّي هو عظيم ولو حصل جرح . ن . عميق وما نبي للعكس صار
وهو بكل خلقه رحيم وهو مفرّج كل ضيق وهو لكل شي . ن . قدير !!
فيه ناس بأقسى حال وتدعي الله ما تمل ّوهي كذا ليل ونهار
من سبب اهْل الظلال ومن يبي شي يكتملّ ومن يبي شي . ن . يصير !!
ونحمد الله لا خراب ولا حروب . ن . بعد سلم ولا هو برد اعْتبار
ولا هي بدوله تعاب ولا وجود لأي ظلم وهي كذا مبطي تسير !!
ولا هو ابْموقع اشد ولا هو بوقت الزّحام ولا هو بوقت انْتشار
ومع كذا هالوضع شد ولا هو يوصف بالكلام ولو هو بالصّوره يثير !!
وهذا وقت وهذا يوم ويا عسى ربّي يعين ولا قتل والاّ انْتحار
ولا عتاب . ن . والاّ لوم ولا هو اظْهار الدفين ولا هو ترديد الضّمير !!
ولا حصل بعده قصور وكل ولاة الامْر خير ولا هو القصْد افْتخار
كل هذا بس شعور ولا ادوّر منه غير وربّي يعلم به بصير !!
ناس في نفس المكان ولا تقصّر بأي امْر ولا هي بوضع اخْتبار
ولو هو ابْليا امان وحول خوف وفوق جمْر وذا يغيث وذا يشير !!
وناس تسْرق ما تشوف ولا هي بتْحسّب حساب ومثل من تجلب لعار
في مثل هذي الظروف ولا مثل هذا المصاب ووضع ما مثْله مرير !!
نطلب الله ما يعود وانّ ذا الحادث وداع وانّ ذا آخر مسار
حتّى لو بقصى الحدود وانْ ذا آخر اجْتماع وانّ ذا الحزن الأخير !!
وجعْل من فارق حبيب وارْتشف ذا اليوم كاس ولو هو يتْجنّب لنار
ويشفى عجْل . ن . من اصيب ولا يشوف اليوم باس ولا هو يبقى عالسرير !!
وهذا آخر ما أقول ومن توكّل ما يضيع وبس من الرّب اخْتيار
ولا انْسى اصلّي عالرسول ويا عساه اللّي شفيع وذا العمر عمر . ن . قصير !!


وسلامتكم .